Weather Update : राज्यात गेल्या काही दिवसांपासून उकाडा वाढत असतानाच, आता पावसासाठी पुन्हा एकदा पोषक वातावरण निर्माण झाले आहे. हवामान विभागाने दिलेल्या अंदाजानुसार, विदर्भ, मराठवाडा आणि मध्य महाराष्ट्रात आज विजांच्या कडकडाटासह जोरदार पावसाची शक्यता आहे. त्यामुळे या भागांसाठी ‘यलो अलर्ट’ जारी करण्यात आला आहे.
हवामान स्थिती
- कमी दाबाचे क्षेत्र: वायव्य अरबी समुद्रात पाकिस्तानच्या किनाऱ्याजवळ कमी दाबाचे क्षेत्र सक्रिय झाले आहे, मात्र त्याची तीव्रता कमी होत आहे.
- मॉन्सूनचा पट्टा: मॉन्सूनचा कमी दाबाचा पट्टा सध्या राजस्थानपासून ईशान्य बंगालच्या उपसागरापर्यंत सक्रिय आहे.
- चक्रवाताची स्थिती: बंगालच्या उपसागरात ओडिशा आणि आंध्र प्रदेशच्या किनाऱ्याजवळ समुद्रसपाटीपासून ४.५ किलोमीटर उंचीवर चक्रवाताची स्थिती निर्माण झाली आहे.
या सर्व हवामान प्रणालींमुळे राज्यात पावसाची शक्यता वाढली आहे.
‘यलो अलर्ट’ जारी केलेले जिल्हे
- जोरदार पावसाचा इशारा: सोलापूर, परभणी, हिंगोली, नांदेड, वाशीम, यवतमाळ, वर्धा, चंद्रपूर, गडचिरोली आणि गोंदिया.
- विजांसह पावसाचा इशारा: अहमदनगर, पुणे, सातारा, सांगली, सोलापूर, धाराशिव, लातूर, बीड, बुलढाणा, अकोला, अमरावती, नागपूर आणि भंडारा.
मागील २४ तासांतील पावसाची नोंद
बुधवारपासून वाढलेल्या उकाड्यानंतर राज्याच्या काही भागांत पावसाने जोरदार हजेरी लावली. गुरुवारी (११ सप्टेंबर) सकाळपर्यंतच्या २४ तासांत, नांदेड जिल्ह्यातील किनवट येथे सर्वाधिक १३० मिमी, तर सोलापूर येथे १२० मिमी पावसाची नोंद झाली. राज्यातील कमाल तापमान ब्रह्मपुरी येथे ३४.६ अंश सेल्सिअस नोंदवले गेले.
पुढील काही दिवसांत या जिल्ह्यांमध्ये पाऊस होण्याची शक्यता असल्याने नागरिकांनी सतर्क राहावे.